لكي تكون مصمم جرفيك ناجح

لكي تكون مصمم جرافيك ناجح فى شركه دعايه واعلان لازم يكون عندك فكره عن الدعايه والاعلان قبل ما تتقدم لاى شركه لان ده اول سؤال بيتوجه ليك من مدير الشركه لما بتروح تتقدم وكمان مش معقوله ان شركه دعايه تشغلك مصمم اعلانى عندها وانت متعرفش يعنى ايه دعايه ويعنى ايه اعلان
علشان كده اول جزئيه حنبدأ بيها هي التعريف بالدعايه والاعلان لان الجزئيه دى مهمه جدا لاى مصمم اعلانى والجزئيه دى لو استوعبتها كويس وفهمتها جامد حتأثر عليك بعد كده فى شغلك وحتفرق معاك جامد بجد وانتوا حتحسوا بكده لما ندخل فى باقى الجزئيات التانيه ان شاء الله

ما هو الدعايه والاعلان ؟؟؟؟؟
ناخد المعنى العام للعباره وهوه ( الاعلان )
الاعلان ده يا جماعه زى ما موسوعه ويكيبيديا بتقول هو احد الأنشطه الاعلاميه التى لا غنى عنها للأنشطه الاقتصاديه من صناعه وتجاره وخدمات وغيرها من الانشطه الاقتصاديه وكذلك بالنسبه للمؤسسات والجمعيات الخيريه الغير ربحيه والتى بدون الإعلان عن مجهوداتها فلن تحصل على الدعم المجتمعى والتمويل المادى اللازم لاستمرارها فى عمها وادائها لرسالتها
نفسر بقى العباره بتأنى
اول جزء بيتعرض لاهميه الاعلان للانشطه الاقتصاديه وان اى نشاط اقتصادى سواء كان صناعه ( مصنع سيراميك مثلا) او تجاره (شركه توزيع مواد غذائيه ) او خدمات ( شركات الاتصالات )
اى نشاط من دول بيحتاج الدعايه جدا جدا جدا بغض النظر عن جوده المنتج او الخدمه اللى بيأديها
تخيل مثلا مصنع سيرميك ( كمثال ) فتح باستثمارات كبيره وبعد ما انتج معملش اعلانات فى التليفزيون او الجرايد عن انتاجه هل تتخيلوا انه ممكن يبيع بلاطه واحده
نبص برضه لشركات الاتصالات بصفتها اكبر ناس بتعمل دعايه دلوقتى لنفسها
ليه شركات الاتصالات عندنا فى مصر بتصرف ملايين على الدعايه
ليه كل ما تدخل شارع وتبص على السنترالات اللى فيه تلاقى اليفط بتاعته عاملاها شركه من شركات الاتصالات ؟
ليه شركات الاتصالات محاصرانا بكميه اعلانات مهوله فى التليفزيون والجرايد وفى الشارع وفى المناسبات
الاجابه يا جماعه علشان كل شركه عاوزه عدد المشتركين اللى عندها يزيد وكمان استهلاك المشتركين بتوعها يزيد
نيجى برضه لجزئيه الجمعيات الخيريه وهى ان الجمعيات الخيريه من غير ان اعلان عن نفسها مش حتاخد اى دعم نهائى
تخيل كده مستشفى الاطفال اللى لسه فاتحينها لو مكانوش عملوا ليها دعايه هل كانت حتتفتح اساسا
الاجابه طبعا لأ
معلش يا جماعه انا باطول عليكوا شويه فى الاول بس علشان ادخل فكره الدعايه فى دماغكم صح لان فيه ناس كتيره اوى فاهماها غلط
نفك دماغنا بقى دلوقتى من الامثله الكبيره بتاعه الشركات والمصانع وشركات الاتصالات ونروح للأمثله الصغيره اللى موجوده فى شوارعنا
الجزار مثلا اللى فى منطقتك
هل انت متخيل ان الجزار ده بيعمل دعايه
طبعا بيعمل دعايه بس هل الدعايه اللى بيعملها بتكون اعلان فى التليفزيون او فى الجرايد
طبعا لا بس الدعايه بتاعته بتبقى فى النطاق بتاعه
ازاى
الدعايه بتاعته حتلاقيها من اول الاكياس اللى كاتب عليها اسم المحل ودى دعايه مهمه على فكره لان فيه ناس كتير مش بترمى الكياس
وحتلاقى الدعايه دى برضه قائمه الاسعار اللى حاططها بره
وكمان فى يافطه المحل وساعات فى اليفط الصغيره ( اسمها فوانيس ) اللى بتلاقيها على قمه الشارع
نروح برضه لمثال كمان حلو
الدكتور
من المعروف ان اى دكتور لما بيفتح عياده بيعتمد اكتر على مهارته علشان ده يجيبله الزباين
يعنى بيعمل دعايه بمهارته
بس مش بيعتمد على مهارته بس ليه
لانه لو كان بيعتمد على مهارته وخبراته بس مكانش كتب اسمه على الروشته اللى بيديهالك
ومكانش كتب اسمه على اليافطه بتاعه العياده
ومكانش عمل لنفسه كروت شخصيه
ومكانش عمل لنفسه اعلانات فى الشوارع
بالتالى يا جماعه
الفكره اللى عاوز اوصلهالكم
ان اى حد بيقوم بنشاط مهما كان النشاط ده صغير بيحتاج للدعايه جدا
عاوز اوصلكم فكره ان اى حاجه عليها اى اسم لاى محل او اى منتج دى عباره عن دعايه
مهما كان المحل ده صغير ومهما كان المنتج مش مهم ومهما كان اللى بيعمل الدعايه ده مشهور اساسا
قيس كل الكلام ده على كل محل بتشوفه فى الشارع
وكمان قيسه على عيادات الدكاتره ومكاتب المحامين وشركات الكمبيوتر
ومراكز التدريب والمعاهد واى حاجه فاتحه علشان تكسب فلوس
فهمنا كده بقى يعنى ايه اعلان
نروح بقى لانواع الاعلانات
انواع الاعلانات كتيره اوى يا جماعه ومتشعبه وقابله للتطوير فى اى وقت وممكن اى فكره بسيطه تبقى اعلان ويكسر الدنيا
وانواع الاعلانات هى:
1- الاعلانات المطبوعه : وهيا دى اللى بتهمنا فى الاساس وتشمل اعلانات الصحف والمجلات والدوريات والمنشورات والملصقات
2 - الاعلانات الخارجيه : وهى اعلانات الشوارع والمعارض والاعلانات اللى على العمارات وعلى الاتوبيسات
3 - الاعلانات المسموعه : وهى الاعلانات الاذاعيه
4 - الاعلانات المرئيه المسموعه : وهى اعلانات التليفزيون ودى المنتشره اكتر وكمان فيه اعلانات السينيمات
5 - الاعلانات على شبكه الانترنت : ودى مكنتش موجوده قبل كده وظهرت مع تطور عالم الانترنت وزياده اعداد المستخدمين
وعلى فكره حنعرف بعد كده ان اعلانات الانترنت مهمه جدا جدا
6 - الاعلانات على الموبايل: ودى برضه ظهرت بعد زياده مستخدمين الموبايل
دلوقتى يا جماعه انتوا كده اخدتوا فكره عن الاعلان وانواعه
نيجى بقى للجزء اللى يهمنا وهو عن الخدمات اللى بتقوم بيها مكاتب الدعايه والاعلان
وانا اقصد المكاتب العاديه مش الوكالات الكبيره لان دى شغلها كبير اوى وعلشان توصلها لازم تاخد الخبره العمليه فى المكاتب العاديه
مكاتب الدعايه والاعلان العاديه بتشتغل فى
الكروت الشخصيه
الورق المطبوع ( فلاير)
اليفط بانواعها ( البنر والفيلكس والفنيل)
الاكياس المطبوعه
النتائج والاجندات المطبوعه
الاوراق والسجلات التجاريه ( طباعه دفاتر وفواتير التجار والشركات وروشتات العيادات وفولدرات المحامين )
اغلفة المجلات والكتب والسى دى
تصميم مواقع وصفحاب الويب ( وده مش كل المكاتب بتشتغل فيه)
ده كان الشغل الموجود فى المكاتب العادية وبالنسبة لوكالات الدعاية والاعلان فبيشتغل فى كل ما سبق ذكره بالاضافة الى عمليات الميديا وتأجير المساحات الاعلانية فى الطرق والقنوات التليفزيونه والاذاعه والاستعانه بالممثلين والمخرجين وخبراء التسويق والطباعة وخدمه العملاء والعلاقات العامة وغيرها من الانشطه الكبيرة جدا التى تمارسها وكالات الدعايه
ما سبق كان مقدمة عن فكرة الدعاية لتوصيل مفهوم الدعاية والاعلان الصحيح الى شبابنا فى العالم العربى من اجل اقتحام هذا المجال الشيق جدا والغامض بالنسبة للكثيرين

</SPAN>

يعطيك العافيه مديرنا الفاضل ولي عوده

اشكرك لمرورك الطيب اسماء

» كيف تكون سعيدا ؟؟؟
» كيف تكون لبقا؟
» هزهزة الطفل قد تكون قاتلة
» حكم وامثال وتنفع تكون مسجات